D Gschicht vomene Güezi im Chuchischaft

Hallo, ja hallo, ig bis, ihres Lieblingsgüezi, no ligeni im Chuchischaft, aber wär weis scho wie lang ig no da darf lige! Igrendwenn het si wider ihre Frässluun und ig weiss, denn geits mir a Chrage! Guet, wenn ig glück ha, de nimmt si zersch alli andere, die wo näbe mir ir Schachtle lige, oder die ir andere Schachtle, villich sogar zersch die wo im Sack si! Glück für mi, aber ig cha ja nid verstah dass si denn am angere dr Vorzug git, ig finde die si längwilig, abschöilich längwilig! Hmmm, villich verzelleni mal chli öppis vo mir, also ig bi äs Güezi, äs feins, eis wo si gärn het, eis wo Schoggi dranne het, das liebt si, ig ha das gmerkt. Die andere näbe mir hei meischtens ou Schoggi dranne und mängisch ligt PUURE Schoggi näbe mir, also da frageni mi würklich, isch doch faad, eifach so puure Schoggi, aber wie immer, ig schweife ab, isch chli mini Art, gwöhn di dra, wenn mini Gschicht wotsch läse!

Mau öppis zu minere Entstehig und Machart, früecher, hani mir lah säge, isch das alles angers über d Bühni, da isch eine gsi wo üs gmacht het – Ou achtung, mis Schafttöri geit uf, hoffentlich wott si mi ize nid….neiiiiiiii, ig verzelle grad mini Gschicht, nid mi, bitte,nimm die andere, die faade, längwilige! – Puh, si hets wider zuegmacht, si kämpft gloubs no chli mit sich, mues sicher pressiere mit verzelle, ja wo bini gsi?

Ahja, äs git Kolleginne und Kollege wo bhoupte, dass si ghört heige, vo alte, abgloffne Güezi, dass früecher ei einzige üs gmacht heig, ungloublich, wenn ig dänke wies hüt so zue und här geit, da si mindischtens sächs Lüt wo üs beguetachte. Mir fahre da so übernes Loufband und mängisch stockts und äs paar vo üs verbräche i tuusig Brösmeli, me hofft de, dass das nume de andere passiert. Ungloublicherwis isches sogar so, dass mängisch eine vo dene Manne oder Froue eis vo üs eifach is Muu stecke und ässe, ohni dass mir öppis vo dere Wält gseh hei! Äbe, zersch chunnt mal üse under Teil ad Reihe, wird liecht bache, när chöme mir under soner Maschine düre wo üsi Füllig druf drückt, de dr ober Teil und wenn mir scho langlang uf däm Loufband si gsi – mir isch fasch chli schlächt worde drbi – chunnt äs Fangärmli und tunkt üs ines Schoggibad, aber nume ei Helfti, denn ganz am Schluss chöme mir id Schachtle, äs paar usgwählti chöme mit wildfrömde Güezi i die gliichi Schachtle, also ig bi scho froh, dass ig mit miner Gattig zämecho bi, wüll, ig weis ja nid ob die mini Sprach verstöh und rede, wär ja läschtig wenni mi nid chönnt ungerhalte, oder? Drum bini froh, dass ig mit mine „Gschwüschterte“ ir gliche Schachtle glandet bi! Tja, nachdäm ig i dere Schachtle glandet bi gsi hei sü üs mit tuusige anderne Schachtlene ufnes palett gleit und ine Laschtwage packt, läck, isch das lut gsi und mir hei müesse brüele für üs z verständige und das woni doch sone drang ha chli z brichte! Mit einere wo öppe drü Schachtle über mir isch gsi hani sogar chli Fründschaft gschlosse, die isch de im Lade grad hinger mir gläge, also hei mir die Fründschaft no chli chönne vertiefe! Ja äbe, dr Lade, da si mir acho und irgend sone fürchterlich hässigi Person het üs ines sogenannts Gstell itischet, mir si de no a Bode gheit und ig ha Glück gha, mir hets nüt gmacht, aber dä näbe mir, sona Jammeri, dä hets grad ir Mitti verbroche, het äs Risedrama gmacht, da hanem gseit, är wärd ja sowieso gässe, also söller höre chlöne, naja, är isch de chli hässig worde, het aber de gschwige! So bini äbe, muesch d Wält nid mitnere rosarote Brülle aluege, geng öppe äs Witzli mache, aber d Realität vor de Ouge bhalte! Hei die öppe z Gfüel, dass öpper si usem Schachteli nimmt und ufstellt? Nenei, da macheni mir nüt vor! Äbe, när isch SIE cho, die wo üs kouft het, die andere hei ghüület und töibelet, aber ig bi froh gsi mau öppis anders z gseh, als geng usem Gstell grisse z wärde, meischtens vo zwängende Chind und dene widerum us de Händ grisse z wärde vo gnärvte Müetere. Hei, chöit dir öich vorstelle wie me sich da füelt? Me angschtet um sis Läbe, jede Momänt chönnt me abegheie und dä Lärme, ja, dasch z schlimmschte, wenn eim sones sabbernds Chlichind ir Hand het und plääret und d Mueter brüelet dasume, nenei, also ig bi froh gsi wo si üs aglueget het und denn usem Gstell usegnoh und is Wägeli gleit het. Obwohl, dert isch z Stimmegwirr enorm gsi und alles Frömdsprache, also am schregschte si ja d Galachäsli gsi, also die versteit ja niemer und he, z Gmües, die si ja villich arrogant und ibildet, si sige gsünder als mir und blablabla, die hani no grad so verstande. Aber was wüsse die vom Hochgfüel wo die überchöme wo üs ässe, also ussert die sogenannte Vegetarier het ja niemer würklich sooo fröid am Gmües, oder? Und unger üs gseit, also ig ha ghört, also d Nussschoggi usem andere Gstell äne, die het das mal gseit, dass Süesses, vor allem öppis wo Schoggi dinne het bi de Froue so äs ähnlichs Gfüel uslöst wie ä Orgasmus, nid dass ig wüsst was das isch, aber äs tönt guet, oder?

Ui, si chunnt wider, tuet dr Schaft uf, ig has gwüsst, äs het so müesse si, was nimmt si ächt ize, no het si die andere ir Hand, leit se wider häre, ups, iz het si üs ir Hand, nimmt üs use und tuet dr Schaft wider zue, ou, iz isches äuä so wit, aaaaaauuutsch, dä ohrebetöibend Lärm, das hani bis ize nume gedämpft ghört, amigs am Morge und nume so zwüschdüre! Mhhh, das schmöckt aber guet, was isch ächt das? Isch ächt das das Kafi wo mir die verzellt hei wo i dene Schachtle si gsi wo si nid ufgässe het? Eh iz tuet si d Schachtle uf, läck isch das häll, weles nimmt si ächt als erschts? Ui, dr Jammeri, vo däm woni verzellt ha, sicher wüll är nümme ganz isch. Schwig doch ändlich, meinsch äs nützt dir öppis wenn brüelisch? Dasch ou sone naive gsi, wo gmeint het är wärd nie gässe, tststs! Hmm, si lächlet, dä isch äuä guet gsi! Ui, si het mi ir Hand, ououou, iz isches äuä Zit, dass ig mi verabschide, langsam häbt si d Hand und tuet z Muu uf, jesses, also dasch nid grad ä schöne Ablick, aber henu, äs isch wies isch…gits ächt ä Güezihimmu? Wenn ja, de mäude ig mi mau wider, ok?….adie zäme

Copyright by Anita Mischler 2007